बुद्ध जन्मस्थल लुम्बिनीस्थित मायादेवी मन्दिरको प्रवेश शुल्क वृद्धि गरिएको छ । स्थानीय सरोकारवालाको अनुरोध र सर्वोच्च अदालतको आदेशविपरीत लुम्बिनी विकास कोषले शुल्क वृद्धि गरेको हो ।
कोरोना महामारीले थलिएको पर्यटन क्षेत्र उकास्न राहत प्रदान गर्नुपर्नेमा कोषले प्रवेश शुल्क वृद्धि गरेको छ । कोषको गत साउन २९ गते बसेको परिषद् बैठकले असोज १ गतेबाट शुल्क बढाउने निर्णय गरेको थियो । उक्त बैठकले नेपालीलाई तय गरिएको प्रवेश शुल्क वृद्धि गरेको छैन ।
भारतीय, सार्क र तेस्रो मुलुकका पर्यटकका लागि बढाइएको छ । साउनमै शुल्क बढाउने निर्णय भए पनि निर्णय कार्यान्वयनपछि मात्रै बल्ल यसबारे पर्यटन क्षेत्रमा सरोकार राख्नेलाई जानकारी भएको हो। भारतीय नागरिकका लागि यसअघि ४० रुपियाँ शुल्क थियो । अहिले ८० रुपियाँ पुर्याइएको छ ।
सार्क मुलुकका नागरिकका लागि यसअघि तीन सय रुपियाँ शुल्क थियो । अहिले उक्त शुल्क वृद्धि गरेर चार सय रुपियाँ बनाइएको छ । तेस्रो मुलुकका नागरिकले मायादेवी प्रवेश गर्न ६ सय रुपियाँ तिर्नुपर्थ्याे । अहिले आठ सय बनाइएको छ ।
कोषका सदस्य सचिव सानुराजा शाक्यले सबैतिर महँगी बढेकाले शुल्क पनि वृद्धि गरिएको बताउनुभयो । थोरै शुल्क वृद्धिलाई अन्यथा लिन नहुने उहाँको भनाइ छ । यहाँ २०६५ सालबाट प्रवेश शुल्क लगाएको थियो । उक्त निर्णय विरुद्ध स्थानीय दिलीप बानियाँले सर्वोच्च अदालतमा मुद्दा दायर गर्नुभएको थियो । अदालतले शुल्क नलिन आदेश गरेको थियो । आदेशपछि नेपालीबाट शुल्क नलिए पनि विदेशीबाट विकास कोषले असुल्दै आएको थियो ।
तत्कालीन पर्यटन मन्त्री रवीन्द्र अधिकारीको अध्यक्षतामा २०७५ जेठ १ गते बसेको बैठकले उही वर्षको भदौ १ गतेदेखि नेपालीबाट पनि शुल्क लिने निर्णय गरेको थियो । पहिले एउटा टिकटको तीन दिनसम्म मान्यता हुन्थ्यो । अहिले बिहान ६ बजेदेखि साँझ ८ बजेसम्म मात्र मान्य हुन्छ । कतिपयले शुल्क बढाइएकोमा असन्तुष्टि व्यक्त गरेका छन् ।
