कपिलवस्तु, असोज २० गते । चाड पर्वमा आवत–जावत गर्ने यात्रुलाई सहयोग गर्नका लागि कपिलवस्तुका पाँच स्थानमा यात्रु सहायता कक्ष (हेल्प डेस्क) स्थापना भएका छन् ।
जिल्ला ट्राफिक प्रहरी कार्यालय कपिलवस्तुले शनिवारदेखि कृष्णनगर, चन्द्रौटा, गोरुसिङ्गे, पिपरा र तौलिहवामा यात्रु सहायता कक्ष सञ्चालनमा ल्याएको छ । दसैँ तिहारमा घरमा आउने र जाने यात्रुलाई सुरक्षित तरिकाले गन्तव्यमा पुगाउन र नागरिकमा पर्ने समस्यामा सहयोग गर्न कक्ष स्थापना गरिएको जिल्ला ट्राफिक कार्यालयका प्रहरी निरीक्षक अनीश भण्डारीले बताउनुभयो ।
यात्रुहरूको बढी भिडभाड र आगमन हुने प्रमुख चोक र बसपार्कमा सहायता कक्ष स्थापना भएको छ । चाड पर्वको बेला क्षमताभन्दा धेरै यात्रु बोक्ने, तोकिएको भाडादरभन्दा धेरै असुल्ने, मापसे तथा लापसेगरी सवारी चलाउने, यात्रुसँग अभद्र व्यवहार गर्ने क्रियाकलाप निरुत्साहित हुनेछ ।
दसैँमा यात्रुहरूको चाप बढी हुन्छ । उहाँहरूलाई आउने समस्यामा सहयोग गर्नेगरी प्रहरी खटिएको छ । नेपाल भारत सीमामा रहेको कृष्णनगर नाका हुँदै घर फर्किनेहरूको चाप अत्यधिक हुने भएकाले हेल्पडेस्कमा विशेष चासो हुने ट्राफिक प्रहरी नायव निरीक्षक राघवसिंह रावलले बताउनुभयो ।
यात्रु चढ्ने स्थलमा प्रहरी सक्रियता हुँदा बढी भाडा असुल्ने, सिट क्षमताभन्दा बढी यात्रुहरू राख्ने, यात्रुलाई अनावश्यक सास्ती दिनेलगायतका कार्य निरुत्साहन हुने बताइएको छ । सहायता डेस्कमा ट्राफिक प्रहरी र नेपाल प्रहरीको संयुक्त टोली खटिने छन् ।
