तौलिहवा, मंसिर ६ गते । कपिलबस्तुको जगदीशपुर तालमा माछाको भुरा छाडिएको छ । विश्व मत्स्य दिवसको अवसरमा विश्व सिमसार क्षेत्रमा सूचीकृत जगदीशपुर तालमा दश हजार माछाको भुरा छाडिएको हो । ‘जलीय जैबिक बिबिधताको संरक्षण गरी आश्रित समुदायको रोजगारी सुनिश्चित गरौ’ भन्ने नाराका सहित भेटेनरी अस्पताल तथा पशु सेवा बिज्ञ केन्द्रले दिवसमा अवसरमा सो तालमा स्थानीय र बिकासी जातका माछाका भुरा हालेको हो ।
जिल्ला समन्वय समितिका प्रमुख बावुराम आचार्य जगदशीपुर जलासय ब्यवस्थापन बहुरोकार मन्चका अध्यक्ष ललित गुरुङ, बिज्ञ केन्द्रका प्रमुख डाक्टर प्रबेज आलम लगायतले तालमा भुरा हालेका थिए ।
कार्यक्रममा जिल्ला समन्वय समितिका प्रमुख आचार्यले ब्यवसायिक माछा पालनमा कृषकहरुलाई आकर्षित गर्ने खालका कार्यत्रलम ल्याउनु पर्ने बताउनुभयो । उत्पादन गरेका माछाको बजारीकरणका लागि सरकारले पहल गर्नु पर्ने उहाँको भनाई छ । उहाँले भारतबाट अबैधरुपमा आयात हुने माछालाई रोक्न सिमा नाकामा नै कडाई गर्नु पर्ने बताउनुभयो ।
बहुसरोकार मन्चका अध्यक्ष ललित गुरुङले मनोरम तालमा बिज्ञ केन्द्रले माछाको भुरा हाल्नु राम्रो काम भएको बताउनुभयो । उहाँले १ सय ५७ हेक्टरमा फैलिएको तालमा ३० किलो बढीको माछा र बिभिन्न पंक्षीहरु समेत रहेको बताउनुभयो । तालमा रहेको माछालाई सरकारले ब्यवस्थापन गर्न दिनु पर्ने उहाँले जोड दिनुभयो । सिमसारको नाममा माछा मार्न नहुने भन्ने कुरा गलत भएको भन्दै माछाको ब्यवस्थापन हुनु पर्ने बताउनुभयो ।
कार्यक्रममा बिज्ञ केन्द्रका प्रमुख आलमले माछामा प्रोटिनको मात्रा बढी पाईने, आयआर्जनको माध्यम, औषधीय गुणले भरिपुर्ण रहेको तथा पर्यटन र मनोरंजनको साधन भएकाले माछा महत्व रहेको बताउनुभयो । तालमा कमन, सिल्भर, रोहु र नैनी ढाई ढाई हजारका दरले भुरा हालिएको बिज्ञ केन्द्रका प्रमुख आलमले बताउनुभयो ।
उहाँले तालमा रहेका माछाको संरक्षण र प्रबद्र्धनका लागि भुरा हालिएको बताउनुभयो । माछाको ब्यवसायिक प्रबद्र्धन गरी आयआर्जन गर्ने कुरा नेपाल र कपिलवस्तमा प्रशस्त संभावना रहेको उहाँको भनाई छ । उहाँले देशमा ९१ हजार ८३२ र कपिलवस्तुमा २ हजार ३४ मेट्रिक टन माछा उत्पादन हुने गरेको बताउनुभयो ।
मत्स्य बिकास अधिकृत रामकेश यादवले माछा उत्पादनमा जिल्ला आत्मनिर्भर रहेको बताउनुभयो । जिल्लामा ३७ वटा ताल तलैया र ४ सय ८० हेक्टर प्राकृतिक जलासय रहेका छन । प्राकृतिक जलायसबाट जिल्लाको कुल उत्पादन मध्ये ३० प्रतिशत हिस्सा त्यहीबाट आउने गर्छ । उहाँले कपिलवस्तुलाई माछाको पकेट क्षेत्र बनाउनका लागि कृषकहरुलाई माछा पालन तर्फ आकर्षित गराई अनुदान समेत दिनु पर्ने बताउनुभयो । कार्यक्रम केन्द्रका प्रमुख आलमको अध्यक्षता र मत्स्य प्राबिधिक माधव पौडेलको संचालनमा भएको थियो ।
