तौलिहवा, पुस १५ गते । कपिलबस्तुको शिवराज नगरपालिका वडा नं. ३ खरेन्द्रपुर चौकमा निर्माण गरिएको पृथ्वी नारायाण शाहको शालिक पूर्व राजा ज्ञानेन्द्र शाहद्वारा अनावरण गरिएको छ । पूर्वराजा स्व. वीरेन्द्र शाहको जन्मोत्सवको अवसर पारेर पूर्वराजा ज्ञानेन्द्र शाहले पृथ्वीनारायण शाहको शालिक अनावरण गर्नु भएको हो ।
पश्चिमी जिल्लाहरुको भ्रमणमा रहेको उहाँले शिवराजन नगरपालिकाकाद्वारा २५ लाखको लागतमा निर्माण गरिएको शालिक रातो ब्यानर उघारेर शिलान्यास गर्नु भएको छ । सोक्रममा पूर्वराजा शाहले त्यही झन्डोत्तोलन समेत गरेका थिए । भैरहवामा रहेका शाह आफ्ना नाति हृदेन्द्रलाई समेतसँगै ल्याएका थिए । भैरहवा देखि बहादुरगंजसम्मको हुलाकी बाटो हुँदै उहाँ दिउँसो ३ बजे तिर खरेन्द्रपुर पुगेका थिए ।
खरेन्द्रपुर स्थित बालहंस साङ्गवेद गुरुकुलमा रहेको स्वर्णद्वारा आश्रममा पूजापाठ पछि उहाँले शालिक अनावरण गरेका हुन । पूजापाठका क्रममा बटुकहरुले स्वस्तिक वाचन गरेका थिए । पूर्वराजा शाहले नागरिक अभिनन्द समेत ग्रहण गरेका थिए ।
पूर्वराजा र हृदेन्द्रलाई हेर्न खरेन्द्रपुर चोकमा भीड लागेको थियो । आधा घण्टाको बसाई पछि उहाँ भैरहवा फर्केका थिए । राप्रपाको तर्फबाट शिवराज नगरपालिकाको नगर प्रमुखमा निर्वाचित अजय थापाको विशेष पहलमा त्यहाँ पृथ्वी नारायण शाहको शालिक निर्माण भएको हो ।
कार्यक्रममा राजतन्त्रको पक्षमा नाराबाजी समेत गरिएको थियो । नगर प्रमुख थापाले पूर्वराजा वीरेन्द्र शाहको जन्मोत्सवको अवसरमा पूर्वराजा ज्ञानेन्द्र शाहको करकमलबाट शालिक शिलान्यास हुन आफैमा ऐतिहासिक क्षण रहेको बताउनुभयो ।
उहाँले बाइसे चौबिसे राज्यलाई एकीकरण गरी नयाँ नेपाल निर्माण गरेका पृथ्वी नारायण शाहलाई यो विशेष अवसरमा सम्मान दिन पाउँदा आफूलाई निकै खुसी लागेको बताउनुभयो ।
