तानसेन, चैत २७ गते । नेपाल टेलिकमको सेवा विस्तार गर्दै सुधार गर्नुपर्नेमा तानसेनमा आयोजित कार्यक्रमका सहभागीले सुझाव दिएका छन् । नेपाल टेलिकमले शुक्रबार तानसेनमा आफ्नो सेवासम्बन्धी गरेको जानकारी एवं अन्तर्क्रिया कार्यक्रमका सहभागीले टेलिकमको सेवा सुधारमा ध्यान दिन सुझाव दिएका हुन् । कार्यक्रममा सञ्चार तथा सूचना प्रविधिमन्त्री रेखा शर्माले नेपाल टेलिकमलाई जनताका बिचमा पु¥याउने र सुधार गर्ने उद्देश्यका साथ अघि बढेको बताउनुभयो ।
उहाँले आफू आएपछि पहिलो पटक हाइवे कनेक्टिभिटीको काम अगाडि बढाउने निर्णय गरे अनुसार काम अघि बढेको जानकारी दिनुभयो । उहाँले सुगम र दुर्गम स्थानमा भएको पनि मोबाइलका फोन नटिप्ने समस्या भएको गुनासोलाई तत्काल समाधान गर्न आवश्यक रहेको उल्लेख गर्नुभयो । उहाँले सरकारी निकायका बिचमा प्रभावकारी समन्वयको अभावमा सरकारी सेवामा अवरोध आएको उल्लेख गर्नुहुँदै त्यस्तो बेलामा जनप्रतिनिधिसँग छलफल गरेर समस्या समाधान गर्नुपर्नेमा जोड दिनुभयो ।
यस्तै नेपाल टेलिकमका निर्देशक सङ्गीता पहाडी अर्यालले समयसापेक्ष टेलिकमले आफ्नो सेवा विस्तार र सुधार गर्दै लगेको जानकारी दिनुभयो । उहाँले अहिले पनि विविध कारणले जनताले चाहे अनुसारको काम हुन नसकेको बताउँदै सेवा सुधारका लागि बजेट र कार्यक्रमको व्यवस्थापन भइरहेको बताउनुभयो । प्रतिनिधि सभाका सदस्य ठाकुर गैरेले अहिले पनि नागरिकले टुजीको सेवा लिनका लागि गुनासो गर्नुपर्ने अवस्था आउनु दुःखद रहेको बताउनुभयो । उहाँले नेपाल टेलिकम राष्ट्रकै राम्रो संस्था भएकाले यसले आफ्नो सेवा सुधार गर्नुको विकल्प नभएको बताउनुभयो । प्रतिनिधि सभाका सदस्य नारायणप्रसाद आचार्यले विद्यालयमा प्रविधि प्रशिक्षण तथा कम्प्युटरसम्बन्धी शिक्षणको नेतृत्व टेलिकमले गर्नुपर्ने उहाँले बताउनुभयो ।
सरकारी निकायले दिने सबै खालको अनलाइन सेवा इन्टरनेटका कारण अवरुद्ध बनेकाले सेवा सुधार गर्नुपर्नेमा उहाँले जोड दिनुभयो ।
कार्यक्रममा राष्ट्रिय सभाका सदस्य राजेन्द्रलक्ष्मी गैरेले दुर्गममा सेवा विस्तार गर्दै टेलिकमको सेवा सुधार गर्न सुझाव दिनुभयो । प्रदेश सभाका सदस्य इन्द्रा गहतराजले सहरी क्षेत्रमा पनि इन्टरनेट सुविधा अहिले पनि गुणस्तरीय हुन नसकेको गुनासो गर्नुभयो । यस्तै राजेन्द्र विश्वकर्माले टेलिकमको टावरनजिकै पनि नेटवर्क टिप्ने अवस्था नरहेकोप्रति गम्भीर हुनुपर्नेमा जोड दिनुभयो । जिल्लाको निस्दी, रैनादेवी छहरा, पूर्वखोला, माथागढी क्षेत्रका केही भागमा अहिले पनि मोबाइल फोनका सेवामा सुधार आउन नसकेको सहभागीले बताएका थिए । विद्यालय तथा सरकारी निकायमा निःशुल्क प्रदान गरिएको इन्टरनेट सेवा तीन महिना नचलेर अवरुद्ध बनेको पूर्वखोला–२, जल्पाका वडाध्यक्ष नीरबहादुर सारूले बताउनुभयो ।
