कपिलबस्तु, पुस २८ गते । जिल्लाको मायादेवी गाउँपालिका वडा नम्बर ४ ले कृषि क्षेत्रमा उत्पादकत्व वृद्धि गर्ने उद्देश्यले ९० जना कृषकलाई स्प्रे ट्याङ्की वितरण गरेको छ ।
वितरण कार्यक्रममा मायादेवी गाउँपालिकाका अध्यक्ष वलिउद्धिन खान, प्रमुख प्रशासकीय अधिकृत रामकृष्ण तेली, वडा अध्यक्ष अस्फाक अहमद मुसलमान, वडा सचिव शिव गुलाम कलवार लगायतको सहभागिता रहेको थियो ।
कार्यक्रममा अध्यक्ष खानले कृषि क्षेत्रलाई प्रविधिसँग जोडेर आधुनिक बनाउनु आवश्यक रहेको उल्लेख गर्दै, कृषकहरूको आय वृद्धि गर्न र कृषि उत्पादनलाई व्यावसायिक बनाउन गाउँपालिकाले निरन्तर सहयोग गर्ने प्रतिबद्धता व्यक्त गर्नुभयो ।
वडा अध्यक्ष अस्फाक अहमद मुसलमानले कृषकहरूलाई यस्ता प्रविधिजन्य उपकरणको प्रयोगले उत्पादनमा गुणात्मक सुधार आउने र कृषिमा लाग्ने श्रम कम हुने बताउनुभयो । यो कार्यक्रम विशेष गरी साना तथा मध्यमस्तरीय कृषकहरूलाई लक्षित गरी सञ्चालन गरिएको उहान्ले बताउनुभयो ।
स्प्रे ट्याङ्की पाएपछि कृषकहरु खुशी भएका थिए । गाउँपालिकाले आगामी दिनमा पनि यस्तै कार्यक्रममार्फत कृषकहरूको आर्थिक स्थिति सुधार्न प्रयास गर्ने योजना बनाएको छ ।
