तौलिहवा(कपिलबस्तु), मङ्सिर ९ गते । “महिला तथा बालबालिका माथि हुने डिजिटल हिंसा अन्त्य गरौँ” भन्ने मूल नारासहित ३४ औँ लैङ्गिक हिंसा विरुद्धको १६ दिने अभियान कपिलवस्तुमा जिल्ला प्रशासन कार्यालयको प्राङ्गणमा दीप प्रज्वलन गर्दै सुरु गरिएको छ । गैरसरकारी संस्था महासङ्घ कपिलवस्तुको आयोजनामा, मधेस मानव अधिकार गृहको सहकार्य र पीबीआई नेपालको सहयोगमा कार्यक्रम गरिएको हो ।
सो अवसरमा बोल्दै जिल्ला समन्वय समितिका प्रमुख बाबुराम आचार्यले लिङ्गका आधारमा कुनै पनि प्रकारको भेदभाव स्वीकार्य नहुने स्पष्ट गर्दै डिजिटल क्षेत्रमा बढ्दै गएको महिलामाथिको दुव्र्यवहार रोकथामका लागि सबै निकाय सचेत र सक्रिय हुनुपर्नेमा जोड दिनुभयो । उहाँले “समाज डिजिटल हुँदै जाँदा डिजिटल सुरक्षित वातावरण निर्माण राज्य र समुदाय दुवैको दायित्व हो” भन्दै विद्यालयदेखि घरपर्यन्त सचेतना फैलाउनुपर्ने बताउनुभयो ।
त्यस्तै गैरसरकारी संस्था महासङ्घका केन्द्रीय उपाध्यक्ष सञ्जय लम्सालले डिजिटल हिंसा पहिचान, कानुनी उपचार, मनोसामाजिक सहयोग र पीडितमैत्री संयन्त्रलाई बलियो बनाउन नागरिक समाज, सरकार र समुदायबिच सहकार्य अत्यावश्यक रहेको टिप्पणी गर्नुभयो । उहाँले “डिजिटल दुनियाँ अब दुर्घटनाको ठाउँ नभई अधिकार सुरक्षित राख्ने माध्यम बन्नुपर्छ” भन्दै अभियानले लैङ्गिक न्यायको पक्षमा नयाँ ऊर्जा दिने विश्वास व्यक्त गर्नुभयो ।
वक्ताहरुले डिजिटल हिँसाका रूप, पहिचानका उपाय, किशोरी तथा महिलाका लागि सुरक्षा मार्गदर्शन, कानुनी प्रावधान तथा सामुदायिक भूमिकाबारे आ–आफ्ना धारणा राखेका थिए ।
सो अवसरमा गैरसरकारी संस्था महासङ्घका कपिलवस्तु शाखाका अध्यक्ष जयप्रकाश पाण्डे, दलित सामाजिक विकास केन्द्रकी अध्यक्ष सुरजमती पासी, विभिन्न सरकारी कार्यालयका प्रमुख तथा गैरसरकारी संस्थाका प्रतिनिधिको उल्लेखनीय सहभागिता रहेको थियो । कार्यक्रमको सञ्चालन कालिका सलम्बन सामाजिक केन्द्रका नागरिक परिचालन तथा वकालत अधिकृत अशोक चन्द्र लम्सालले गर्नुभएको थियो ।
