पिस नेपालको सामाजिक परीक्षण कार्यक्रम

कपिलवस्तु, पौष १६ । कपिलवस्तु नगरपालिकाको सभाहालमा पिस नेपालले सामाजिक परीक्षण कार्यक्रम सम्पन्न गरेको छ। पिस नेपाल कपिलवस्तुको आयोजनामा आर्थिक वर्ष २०८१/८२ का लागि सामाजिक परीक्षण कार्यक्रम तौलिहवामा सम्पन्न गरेको हो । कार्यक्रम Room to Read को साझेदारीमा सञ्चालन गरिएको हो ।
कार्यक्रमका प्रमुख अतिथि जिल्ला समन्वय समितिका प्रमुख बाबुराम आचार्यले पिस नेपालले छोटो अवधिमै शिक्षा क्षेत्रमा उल्लेखनीय काम गरेको उल्लेख गर्दै आगामी दिनमा कपिलवस्तुका सबै विद्यालयमा यस्ता कार्यक्रम विस्तार गर्नुपर्नेमा जोड दिनुभयो । “संस्थाले विद्यालय तहमा सिकाइलाई प्रभावकारी बनाउँदै विद्यार्थीमा देखिने परिवर्तन प्रशंसनीय छ,” उहाँले भन्नुभयो ।
कपिलवस्तु नगरपालिकाका नगरप्रमुख सुदीप पौडेलले नगरपालिकाले शिक्षा क्षेत्रमा व्यापक लगानी गरिरहेको बताउँदै पिस नेपालका कार्यक्रमले विद्यालय–विद्यालयका बालबालिकाको सिकाइस्तरमा सुधार आएको बताउनुभयो । उहाँले सिकाइलाई आफ्नो विद्यालयमा मात्र सीमित नराखी छिमेकी विद्यालयसम्म विस्तार गर्नुपर्ने आवश्यकता औँल्याउनुभयो ।
शिक्षा विकास तथा समन्वय एकाइका प्रमुख लोकनाथ मरासिनीले नियमित कक्षा सञ्चालन, शिक्षक तालिम र उत्तरदायित्वपूर्ण शिक्षण अभ्यासमार्फत सामुदायिक र संस्थागत विद्यालयबीचको गुणस्तर अन्तर घटाउन सकिने बताउनुभयो ।
कार्यक्रममा सहायक प्रमुख जिल्ला अधिकारी पदमलाल लामिछाने, जिल्ला समन्वय समितिका स्थानीय विकास अधिकारी जनार्दन अधिकारी, जिल्ला समन्वय समितिका उपप्रमुख रमेश कुर्मी, गैरसरकारी संस्था महासङ्घका अध्यक्ष जयप्रकाश पाण्डे, शिक्षा क्षेत्रका सरोकारवाला, विद्यालयका प्रधानाध्यापक तथा शिक्षकहरूको सहभागिता रहेको थियो ।
कार्यक्रममा पिस नेपालले सञ्चालन गरेका शैक्षिक कार्यक्रमहरूको विस्तृत प्रस्तुतिकरण गरिएको थियो । सहभागीहरूले कार्यक्रमले विद्यार्थीको सिकाइ उपलब्धिमा सकारात्मक प्रभाव पारेको धारणा व्यक्त गरेका थिए ।
सामाजिक परीक्षण कार्यक्रमको सहजीकरण प्रविण कुमार श्रीवास्तव र खगप्रसाद चापागाईले गर्नुभएको थियो ।