कपिलवस्तु । स्थानीय आपत्कालीन कार्यसञ्चालन केन्द्रको कार्यसञ्चालन कार्यविधि मस्यौदा तयार गर्ने उद्देश्यले दुईदिने कार्यशाला सम्पन्न गरिएको छ । दुई दिनसम्म सञ्चालन भएको उक्त कार्यशाला दलित सामाजिक विकास केन्द्र र युनाइटेड मिसन टु नेपालको आर्थिक तथा प्राविधिक सहयोग यशोधरा गाउँपालिका को आयोजनामा सम्पन्न भएको हो ।
कार्यक्रममा बोल्दै प्रमुख प्रशासकीय अधिकृत निराजनराज लम्सालले स्थानीय तहमा आपत्कालीन अवस्थाको प्रभावकारी व्यवस्थापनका लागि स्पष्ट कार्यविधि आवश्यक रहेको बताए । उनले विपद् व्यवस्थापनलाई व्यवस्थित, द्रुत र समन्वयात्मक बनाउन यस्तो कार्यशालाले महत्वपूर्ण भूमिका खेल्ने उल्लेख गर्नुभयो ।
त्यस्तै यूएम एनका विपद् आपत्कालीन विज्ञ रामनाथ ओझाले स्थानीय तहमा विपद् व्यवस्थापनलाई प्रभावकारी बनाउन संस्थागत संरचना र स्पष्ट जिम्मेवारी निर्धारण अत्यावश्यक रहेको बताउनुभयो । उनले आपत्कालीन कार्यसञ्चालन केन्द्रलाई सक्रिय, द्रुत र सूचना प्रवाहमा सक्षम बनाउनु पर्नेमा जोड दिँदै स्थानीय स्रोत, जनशक्ति र प्रविधिको समुचित उपयोगमार्फत विपद् जोखिम न्यूनीकरण गर्न सकिने धारणा व्यक्त गर्नुभयो। उहाँले तयार गरिने कार्यविधिले आपत्कालीन अवस्थामा निर्णय प्रक्रियालाई छिटो, समन्वयात्मक र परिणाममुखी बनाउने विश्वास व्यक्त गर्नुभयो ।
कार्यक्रममा वडा नं. ३ की वडा अध्यक्ष सरिता त्रिपाठी, वडा नं. ४ का वडा अध्यक्ष अहमदली खान, वडा नं. ६ का वडा अध्यक्ष राजकुमार कलवार, वडा नं. ७ का वडा अध्यक्ष चन्द्रप्रकाश दुबे, सुरक्षाकर्मी लगायत विभिन्न शाखाका प्रमुख तथा प्रतिनिधिहरूको सहभागिता रहेको थियो । दलित सामाजिक विकास केन्द्रकी अध्यक्ष सुरजमती पासीको अध्यक्षतामा भएको कार्यक्रमको सञ्चालन रमेश कुर्मीले गर्नु भएको थियो ।
