कपिलवस्तु (मायादेवी) । दलित सामाजिक विकास केन्द्र र युनाइटेड मिसन नेपालको संयुक्त साझेदारीमा सञ्चालित ‘परिवर्तनका लागि बालबालिका, युवा र समुदाय’ परियोजना अन्तर्गत मायादेवी गाउँपालिकामा पालिका स्तरीय वक्तृत्वकला कार्यक्रम सम्पन्न भएको छ।
कार्यक्रममा गाउँपालिकाभित्रका नौवटा विद्यालयका विद्यार्थीहरूको सक्रिय सहभागिता रहेको थियो। वक्तृत्वकला कार्यक्रम बालविवाह, बालगर्भधारण तथा कम उमेरमा बच्चा जन्माउँदा देखिने समस्या, असर र रोकथामका उपायमा केन्द्रित रहेको आयोजकले जनाएको छ।
कार्यक्रमका प्रमुख अतिथि गाउँपालिका अध्यक्ष वलिउद्दिन मुसलमानले बालअधिकार संरक्षण र सामाजिक विकृति न्यूनीकरणका लागि विद्यालय तहबाटै सचेतना आवश्यक रहेको बताउनुभयो। उहाँले विद्यार्थीमार्फत परिवार र समुदायमा सकारात्मक सन्देश प्रवाह हुने विश्वास व्यक्त गर्नुभयो।
शिक्षक रामनिवास चौहानले वक्तृत्वकला जस्ता कार्यक्रमले विद्यार्थीको नेतृत्व क्षमता, सार्वजनिक अभिव्यक्ति र विश्लेषणात्मक सोच विकासमा सहयोग पुग्ने बताउनुभयो।
कार्यक्रममा नौवटै विद्यालयका प्रधानाध्यापक, शिक्षक तथा अभिभावकहरूको उपस्थिति रहेको थियो। सहभागी विद्यार्थीहरूलाई प्रशंसापत्र तथा पुरस्कार प्रदान गरिएको तथा सहभागी प्रत्येक विद्यालयलाई सम्मानपत्र प्रदान गरिएको आयोजक संस्थाले जनाएको छ।
