कपिलवस्तु, फागुन १२ गते । कपिलवस्तु क्षेत्र नम्बर २ का प्रतिनिधि सभा सदस्यका उम्मेदवार सुरेन्द्र राज आचार्य ले घरदैलो भेटघाटका क्रममा प्राप्त जनसुझावलाई प्राथमिकतामा राखेर अगाडि बढ्ने प्रतिबद्धता व्यक्त गर्नुभएको छ।
निर्वाचन प्रचार अभियानअन्तर्गत विभिन्न वडामा पुग्नुभएका आचार्यले पार्टीको संगठन हरेक तहमा सुदृढ रहेको दाबी गर्नुभयो। भातृ तथा शुभेच्छुक संगठनको सक्रियताले चुनाव जित्न सहज वातावरण बनेको उहाँको भनाइ थियो।
उहाँले जेन्जी आन्दोलनपछि नेपाली कांग्रेस ले संगठनात्मक रूपान्तरण गर्दै नयाँ ऊर्जा र योजनासहित अघि बढेको उल्लेख गर्नुभयो। “बदलियो कांग्रेस, बदल्छ देश” भन्ने नारालाई आत्मसात गर्दै पार्टीले विकास, सुशासन र रोजगारीलाई प्राथमिकतामा राखेको उहाँले बताउनुभयो।
लुम्बिनी प्रदेशमा कांग्रेसले उल्लेख्य सिट जित्ने दाबी गर्दै आचार्यले मुलुकलाई सही दिशामा अघि बढाउन कांग्रेस नै सक्षम शक्ति भएको जिकिर गर्नुभयो। मतदाताबाट प्राप्त सुझावलाई आफ्नो आगामी कार्ययोजनामा समेट्ने उहाँले प्रतिबद्धता व्यक्त गर्नुभयो।
