कपिलबस्तु, असोज ११ गते । कपिलबस्तुमा १७ औं विश्व रेविज दिवस विभिन्न कार्यक्रम गरी मनाइएको छ । रेविजको डरलाई कम गर्दै विश्व समुदायलाई रेबिजको जानकारी र तथ्यहरुमा केन्द्रित गर्न आव्हान गर्दै यो दिवस मनाइएको हो ।
भेटेरिनरी अस्पताल तथा पशुसेवा विज्ञ केन्द्र कपिलबस्तुका प्रमुख विष्णु खनालका अनुसार कुकुरको टोकाइबाट ९० प्रतिशत सम्म सर्न सक्ने भाइरस भएकाले बच्नका लागि खोप नै उपयुक्त उपाय भएकाले समयमै सजग हुनुपर्ने बताउनुभयो ।
दिवसमा जनचेतनामुलक कार्यक्रमहरु गरेर, रेविजका बारेमा, यसको रोकथाम अनि यसबाट बच्न अपनाइने सुरक्षाका उपायहरूका बारेमा जानकारी आदान प्रदान गरेर मनाइएको उहाँले बताउनुभयो ।
यस वर्षको नारा ‘सबैका लागि एक, सबैका लागि एकै स्वास्थ्य’ ले स्वास्थ्य केही चुनिएका व्यक्तिका लागि मात्र होइन, सबैका लागि हो भन्ने कुरालाई प्रकाश पारेको छ । यो दिवस लुइस पाश्चरको मृत्युको वार्षिकोत्सवका रूपमा समेत मनाइन्छ । फ्रान्सेली वैज्ञानिक लुइसले रेबिजविरुद्धको पहिलो खोप विकास गरेका थिए ।
यस दिवसको उद्देश्य रेबिजविरुद्धको लडाइँमा सबै समूह, संगठन र सरोकारवालालाई एकजुट गराउने हो । ग्लोबल एलायन्स फर रेबिज कन्ट्रोलले सन् २००७ देखि विश्व रेबिजविरुद्धको दिवसको रूपमा मनाउन थालेको थियो । कालान्तरमा विश्व स्वास्थ्य संगठनले यस दिवसलाई समर्थन गरेको थियो । नेपालले सन् २०३० सम्म रेबिजलाई शून्यमा झार्ने लक्ष्य लिएको छ ।
