कपिलवस्तुमा गहुँ काट्ने क्रममा ‘कम्बाइन मेसिन’ सर्ट भई भीषण आगलागी हुँदा २० बिघा क्षेत्रफलको गहुँ बाली जलेर नष्ट भएको छ।
भित्र्याउन तयार भएको बाली खेतमै खरानी हुँदा किसानको करिब ७ लाख ८० हजार रुपैयाँ बराबरको क्षति भएको छ।
बुधबार दिउँसो साढे १२ बजेतिर यशोधरा गाउँपालिका वडा नम्बर-१ तिर्तिखीका स्थानीय निरञ्जन धोबीको खेतमा गहुँ स्याहार्दै गर्दा लु ९६५९ नम्बरको मेसिनको ब्याट्री ‘सर्ट’ भई अचानक आगो सल्किएको थियो।
हावाहुरीका कारण उक्त आगो तीव्र रूपमा फैलिँदै छिमेकी मायादेवी गाउँपालिका–७ स्थित कर्मा गाउँका खेतहरूसम्म पुगेको प्रहरीले जनाएको छ।
आगलागीमा गहुँ काटिरहेको उक्त ‘कम्बाइन मेसिन’मा समेत आगो सल्किएको थियो। मेसिनलाई पूर्ण रूपमा जल्नबाट जोगाउन तत्कालै नजिकैको पोखरीमा लगेर हालिएको थियो। पोखरीमा डुबाएका कारण महँगो मेसिन भने ठूलो क्षति हुनबाट जोगिएको छ।
स्थानीय बासिन्दा, नेपाल प्रहरी र कपिलवस्तु नगरपालिकाबाट खटिएको दमकलको संयुक्त प्रयासमा करिब डेढ घण्टापछि दिउँसो २ बजेतिर मात्र आगो नियन्त्रणमा आएको थियो।
