सनिउल्ला धोबी
लुम्बिनी, भाद्र २७ । रुपन्देहीका प्रतिनिधि सभा सदस्य सांसद बासुदेव घिमिरेले लुम्बिनी बौद्ध विश्वविद्यालय बुद्धिष्टहरुको लागि एक अन्तर्राष्ट्रिय शैक्षिक हबको रुपमा विस्तार हुँदै गएको बताउनु भएको छ । उहाँले विश्वविद्यालयले छोटो समयमै उल्लेखनीय प्रगति गरेकोमा क्याम्पसका पदाधिकारीहरुलाई धन्यवाद व्यक्त गर्नुभयो ।
लुम्बिनी बौद्ध विश्वविद्यालयको १२ औं स्थापना दिवसको अवसरमा बोल्दै सांसद घिमिरेले विश्वविद्यालयलाई अन्तर्राष्ट्रिय स्तरमा अलग पहिचान बनाउन आवश्यक रहेको धारणा राख्नुभयो । चीन भ्रमणको सन्दर्भमा, उहाँले लुम्बिनीको सांस्कृतिक पहिचानसँग सम्बन्धित उत्पादनशील शिक्षामा ध्यान दिनुपर्ने आवश्यकता औंल्याउनुभयो । लुम्बिनी प्रदेशका सांसद तथा पूर्वमन्त्री चन्द्र केश गुप्ताले यस विश्वविद्यालयलाई गत वर्ष प्रदेश सरकारले ८ लाख रुपैयाँ सहयोग गरेको जानकारी दिनुभयो ।
यस वर्ष संघीय सरकारको बजेट कटौतीका कारण सहयोग प्रदान गर्न नसकिएको स्पष्ट पार्नुभयो । उहाँले विश्वविद्यालयले माध्यमिक तहसम्मको शिक्षा लागू गर्न ध्यान दिन आग्रह गर्नुभयो । विश्वविद्यालयका उपकुलपति प्राध्यापक डा. सुवर्णलाल बज्राचार्यले विश्वविद्यालयलाई अन्तर्राष्ट्रिय स्तरमा चिनाउन विशेष प्रयास भइरहेको बताउनु भयो ।
करिब १५ देशबाट विश्वविद्यालयलाई सहयोग गर्ने इच्छा व्यक्त गरिएको र विशेष योजनाका साथ अगाडि बढिरहेको जानकारी दिनुभयो । राजिष्टार डा. तिलक राम आचार्यले विश्वविद्यालयले दाङ र रुपन्देहीमा शाखा विस्तार गरिसकेको र निकट भविष्यमा कपिलवस्तुमा अनुसन्धान केन्द्र स्थापना गर्ने योजना रहेको बताउनु भयो । कपिलवस्तुमा रहेको बुद्धसाइटलाई ध्यानमा राखी अनुसन्धान केन्द्रको जग्गा प्रक्रिया अन्तिम चरणमा पुगेको छ ।
क्याम्पस प्रमुख डा. नीर बहादुर गुरुङले क्याम्पसको १२ औं वर्षसम्ममा उल्लेखनीय उपलब्धिहरू हासिल भएको बताउनु भयो । विश्वविद्यालयमा अध्ययन गरेका विद्यार्थीहरूले विभिन्न उच्च पदमा अवसर प्राप्त गरेको बताउनु भयो । उहाँले बुद्ध शिक्षालाई आत्मसात गर्दै अघि बढ्नुपर्ने आवश्यकता औंल्याउनुभयो ।
कार्यक्रममा उत्कृष्ट शिक्षकको रुपमा प्राध्यापक अन्जु खनाललाई सम्मान गरिएको थियो भने उत्कृष्ट कर्मचारीहरूलाई पनि सम्मान गरिएको थियो । वार्षिक प्रतियोगिताका विजेताहरूलाई पुरस्कार वितरण गरिएको साथै छात्रवृत्ति पनि प्रदान गरिएको थियो ।
कार्यक्रमको सञ्चालन प्राध्यापक दायानिधी आचार्यले गर्नुभएको थियो, भने प्राध्यापक अन्जु खनालले स्वागत मन्तव्य दिनुभएको थियो । समारोहमा ‘चर्किएको ऐना’ नामक गीत संग्रह विमोचन गरिएको थियो ।
