कपिलवस्तु, वैशाख । कपिलवस्तु जिल्लाको मायादेवी गाउँपालिकाका आठ वटा वडामा रहेका स्वास्थ्य संस्था व्यवस्थापन समितिका पदाधिकारीहरूलाई लक्षित गरी तीन दिने स्वास्थ्य संस्था व्यवस्थापन तथा सुदृढीकरण तालिम सम्पन्न भएको छ ।
युनाइटेड मिसन टु नेपाल (यूएमएन) को सहयोगमा दलित सामाजिक विकास केन्द्र द्वारा आयोजित तथा मायादेवी गाउँपालिकाको समन्वयमा सञ्चालित परिवर्तनका लागि बालबालिका, युवा र समुदाय परियोजना अन्तर्गत तालिम वैशाख १५ देखि १७ गतेसम्म सञ्चालन गरिएको हो ।
तालिमको सहजीकरण स्वास्थ्य शाखा प्रमुख महेन्द्र यादवले गर्नुभएको थियो । तालिममा मायादेवी गाउँपालिकाका विभिन्न वडाबाट आएका २६ जना स्वास्थ्य संस्था व्यवस्थापन समितिका पदाधिकारीहरू सहभागी थिए ।
सिवाईसिसी परियोजनाका संयोजक जितेन्द्र चौधरीले तालिमको उद्देश्य स्वास्थ्य संस्थाको व्यवस्थापन सुदृढ गर्दै सेवा र कार्यक्रमलाई अझ गुणस्तरीय र प्रभावकारी बनाउने रहेको जानकारी दिनुभयो ।
तालिममा सहभागी वडा नं. ५ का वडाध्यक्ष राघवेन्द्र पाण्डेयले स्वास्थ्य संस्थाको सफल व्यवस्थापनका लागि पालिका, वडास्तर तथा स्वास्थ्यकर्मी सबैले आ–आफ्नो भूमिका जिम्मेवार पूर्वक निर्वाह गर्नुपर्नेमा जोड दिनुभयो । “तालिम निकै उपयोगी भएको छ । अब हाम्रो वडाका स्वास्थ्य समस्याहरू समाधान गर्न हामी थप प्रतिबद्ध छौं” उहाँले भन्नुभयो ।
कार्यक्रममा दलित सामाजिक विकास केन्द्रका कार्यकारी निर्देशक राम शरण रैदासले संस्थाले हरेक पालिकासँग हातेमालो गर्दै आएको र फरक तर प्रभावकारी कार्यक्रम सञ्चालन गर्दै आएको उल्लेख गर्नुभयो ।
त्यस्तै, मायादेवी गाउँपालिकाका प्रमुख प्रशासनिक अधिकृत रामकृष्ण तेलीले पालिकाले स्वास्थ्य संस्था सुदृढ गर्न सम्पूर्ण जिम्मेवारी स्वास्थ्य शाखालाई दिएको जानकारी दिनुभयो ।
सो अवसरमा गाउँपालिका अध्यक्ष वालिउद्दीन मुसलमानले स्वास्थ्यकर्मीहरूले आफ्ना कमजोरी सच्याउँदै योजनाबद्ध ढंगले समुदायमा सेवा पु¥याउनु पर्नेमा जोड दिनुभयो ।
