काठमाण्डाै – श्रीभगवती क्लबलाई हराउँदै मनाङ मस्र्याङ्दी क्लबले एन्फा १६ वर्षमुनिको युथ लिग फुटबलमा विजयी शुरुआत गरेको छ ।
सातदोबाटोमा रहेको एन्फा कम्प्लेक्समा आज भएको उद्घाटन खेलमा मनाङले श्रीभगवतीलाई २–१ गोलले हरायो । मनाङका रोहन थापामगर र विवेक मगरले गोल गरे । श्रीभगवतीका सरुन महतोले गोल गरे ।
किशोर फुटबलरको प्रतिभालाई प्रोत्साहन गर्ने उद्देश्यले अखिल नेपाल फुटबल सङ्घ (एन्फा) ले युथ लिग शुरू गरेको हो । तेस्रो संस्करणको प्रतियोगितामा शीर्ष डिभिजनका १४ वटा क्लब सहभागी छन् ।
लिगको विजेताले एक लाख र उपविजेताले ५० हजार रुपैयाँ पुरस्कार पाउनेछन् । यस्तै विधागत उत्कृष्ट अन्तर्गत मोस्ट भ्यालुएबल प्लेयर, सर्वाधिक गोलकर्ता, उत्कृष्ट गोलकिपर र फेयरप्लेले १५ हजार रुपैयाँ पुरस्कार पाउनेछन् ।
९१ वटा खेल हुने युथ लिग आउँदो साउन २६ गतेसम्म सञ्चालन हुनेछ ।
