कपिलवस्तु, असोज ३ गते । संविधान दिवसको अवसरमा राष्ट्रिय मुक्ति पार्टी र नेपाल सद्भावना पार्टीले कपिलवस्तुमा विरोध कार्यक्रम गरी संविधान दिवसलाई कालो दिवसका रूपमा मनाएका छन् ।
विरोध सभामा बोल्दै नेपाल सद्भावना पार्टीका जिल्ला संयोजक केपी शर्मा जॉनसनले संविधानले बहुजातीय, बहुभाषिक र बहुसांस्कृतिक स्वरुपलाई सम्मान गर्न नसकेको भन्दै तत्काल संशोधनको आवश्यकता रहेको धारणा राखेका थिए।
त्यस्तै विरोध सभामा राष्ट्रिय मुक्ति पार्टीका जिल्ला अध्यक्ष कैलाश अग्रहरीले वर्तमान संविधानले सम्पूर्ण समुदायलाई प्रतिनिधित्व गर्न नसकेको र जनताको अपेक्षाअनुसार अधिकार सुनिश्चित गर्न असफल भएको आरोप लगाए ।
कार्यक्रममा महिला नेत्री जमुन्ती भूज मोहम्मद अली, बलराम बारी तथा वरपर सर्वसाधारणलगायतको सहभागिता रहेको थियो । नेताहरूले संविधानलाई समावेशी, न्यायपूर्ण र जनताको चाहनाअनुरूप संशोधन गर्न सरकारलाई दबाब दिने चेतावनी समेत दिए ।
जेनजी प्रदर्शनका क्रममा ज्यान गुमाएका हरूप्रति श्रद्धाञ्जली समेत व्यक्त गरिएको थियो ।
