कपिलबस्तु, फागुन २० गते । कपिलवस्तु जिल्लाको यशोधरा गाउँपालिकाका विपद व्यवस्थापन समितिका सदस्यहरुलाई दुई दिने विशेष तालिम प्रदान गरिएको छ । तालिममा स्थानीय विपद व्यवस्थापन समिति, वडा विपद व्यवस्थापन समिति, र सामुदायिक विपद व्यवस्थापन समितिका सदस्यहरुको सक्रिय सहभागिता रहेको थियो ।
तालिममा विपद व्यवस्थापन र जलबायु उत्थानशिलत लगायतको विषयमा जानकारी गराइएको युएमएनको विपद व्यवस्थापनका व्यवस्थापक राम नाथ ओझाले बताउनुभयो । कपिलबस्तु जिल्ला विशेष गरी आगलागि, बाढी, कटान, शितलहर, र खडेरीको मारमा एकदमै प्रभावित भएको उहाँले बताउनुभयो । विपद जोखिम न्यूनिकरण र जलवायु उत्थानशिलतामा गाँउपालिका, वडा, समुदायको भुमिका बारे समेत जानकारी गराइएको उहाँको भनाई छ ।
सो अवसरमा बोल्दै यशोधरा गाँउपालिकाकी उपाध्यक्ष गुञ्जादेवी मौर्याले विपद व्यवस्थापनमा समुदायको सक्रिय भूमिकाको आवश्यकता औंल्याउँदै यस्तो तालिमले विपद जोखिम न्यूनीकरणमा टेवा पुग्ने बताउनुभयो ।
त्यस्तै वडा नं. २ का वडाध्यक्ष मनोज कुमार चौबेले पालिकाले स्थानीय विपद् व्यवस्थापन कोषको व्यवस्था गर्ने र आउन सक्ने विपद् तथा जोखिमका लागि पूर्व तयारीका आवश्यक सामाग्रीको पनि तय गरिने प्रतिवद्धता समेत व्यक्त गर्नुभयो ।
यशोधरा गाँउपालिकाका कृषि शाखा प्रमुख निरञ्जन तिवारीले पालिकामा दलित समाजिक विकास केन्द्रले विपद व्यवस्थापनका साथै विभिन्न कार्यक्रमहरु सञ्चालन गर्दै आइरहेको बताउनुभयो । केन्द्रले सञ्चालन गरिरहेको कार्यक्रमहरु अत्यन्तै सरहनिय रहेको उहाँको भनाई छ ।
युएमएनले यशोधरा गाँउपालिकामा विगत देखि नै विपद् व्यवस्थापनको काम धेरै नै गर्दै आइरहेको टीम लिडर रुप कुमार विकाले बताउनुभयो । तालिम समापन कार्यक्रममा सहभागीहरूले विपद व्यवस्थापन सम्बन्धी सिकाइलाई व्यवहारिक रूपमा लागू गर्ने प्रतिबद्धता व्यक्त गरेका थिए ।
स्थानीय तहको सहयोग बाट नै जोखिम न्यूनीकरण गर्न सकिने र कार्यक्रम पनि सफल हुन सक्ने केन्द्रकी अध्यक्ष सुर्जमति पासीले बताउनुभयो । कार्यक्रममा वडा नं. १ का वडाध्यक्ष अब्दुल कयुम मुसलमान, वडा नं. ३ की वडाध्यक्ष सरीता त्रिपाठी, वडा नं. ४ का वडाध्यक्ष अहमद अलि, वडा नं. ५ का वडाध्यक्ष जुबेर अहमद मुसलमान, वडानं. ६ का वडाध्यक्ष राज कुमार कलवार, वडा नं. ७ का वडाध्यक्ष चन्द्र प्रकाश दुबे, स्वास्थ्य शाखा प्रमुख विरेन्द्र मिश्रा,केन्द्रका कार्यकारी निर्देशक राम शरण रैदास, जिवन सुधार परियोजनाका परियोजना कार्यक्रम अधिकृत रमेश कुर्मी, शिक्षक लगायतको सहभागिता रहेको थियो ।
